Alarobia fahafito mandavan-taona
- Tsy ankasa: Ekleziastika 4,11-19/Salamo 118/
- Ankasa: Jakôba 4,13b-17/Salamo 48
- Md Marka 9,37-39
Ry Mpampianatra o! Nahita olona anankiray nandroaka demony amin’ny Anaranao izahay, nefa tsy namantsika ka noraranay…
Nolazain’i Marka fa tsy naharoaka ilay Demony moana ny mpianatr’i Jesoa (Mk 9,18) kanefa kosa manakana olona tsy miara-dia amin’izy ireo mampiasa ny anaran’i Jesoa handroahana demony. Mipetraka ny fanontaniana: raha misy olona mahavita tsaratsara kokoa noho isika ny asa ampiandraiketina antsika sy ny mission anirahana antsika, tokony ho faly ve isika sa ho sahirana hiasa loha? Misy olona afaka mampiasa ny anaran’i Jesoa ve dia misy tsy mahazo mampiasa?
Araka ny fitantaran’i Lioka moa dia i Joany no nihazakazaka nitantara tamin’i Jesoa fa nosakanany ireo nandroaka ny demony tamin’ny anaran’i Jesoa satria tsy miaraka aminy, tsy manaraka ny drafitra napetraka harahin’izay te ho mpikambana (Lk 9,49). Mampieritreritra ihany ny trangan-javatra toy izany, raha toa ka manao vary isika no mandalo ny olona iray mba hanome tanana ka mahavita bebe kokoa noho isika dia ho tezitra isika. Raha samy mitondra mody izay voajinjany dia marina sy mitombona ny fialonana, fa raha mijanona ho an’ny tompom-bokatra kosa ny vary azo, ary ny asa atao maimaim-poana, hadalana miaro tsinjaka ny fandraràna izay mahavita bebe kokoa. Fa nahoana àry no tezitra ireo Apôstôly?
Trangan-javatra toy izany dia mety mitranga koa ao amin’ny Fiangonana. Rehefa samy mitady ny voninahitra ho azy sy miezaka hisehoseho ho mahavita misimisy kokoa noho ny hafa, hany ka tsy afaka ny hifaly amin’ny soa hoentina hiderana ny anaran’i Jesoa, rehefa olon-kafa no mahavita izany.
Mazava ny tenin’i Jesoa ho an’izay te ho mpianany: izay mitolona mba ho an’ny fahasambaran’ny madinika sy ny ory dia momba azy; izay tsy misaina izany kosa dia manohitra azy. Matoa misy fialonana sy fifandirana eo anivon’ny Fiangonana dia satria nanjary fitadiavam-boninahitra sy tombontsoa manokana ny asam-panompoana, ka ny zava-doza aza indraindray dia adino hatramin’ny antony niantsoan’i Kristy ny mpianany.
Mazava anefa ny valisoa miandry ny tsirairay: mitovy ny valisoa omena ny mpaminany sy izay mandray ny mpaminany, mitovy ny valisoan’ny olo-marina sy izay mandray ny olomarina (Mt 10,41); ary izay manome rano eran’ny kapoaka ny mpianatr’i Kristy dia tsy ho very valisoa (hohalalinintsika rahampitso).
Tsy misy olona hanao fahagagana amin’ny anaran’i Jesoa ka hanaratsy azy vetivety foana. Mampandinika antsika izany amin’izay ataontsika raha miara-mamory amin’i Kristy isika na sanatria manahaka (Mt 12,30), izany hoe hisintona ny olona ho antsika sy hanaraka ny fombantsika fa tsy ho an’i Kristy, handroaka amin’ny anarany ny herin’ny maizina.