Sabotsy voalohany mandavan-taona
- Tsy ankasa: Hebrio 4,12-16/ Salamo 18B/
- Ankasa: 1Samoela 9,1-4.17-19; 10,1a/Salamo 20/
- Md Marka 2,13-17
Tsy ny finaritra no mila mpitsabo fa ny marary: tsy tonga hiantso ny olomarina aho fa ny mpanota.
Sarotra ny mahita izay endrik’i Jesoa miara-misakafo amin’ny mpanota izay, indrindra rehefa mahazo laka ka mibahana ao an-tsaina ny fiheverana fa avy nikônfesy dia mandry ny kônsiansy, na dia tsy hanam-pikasana hibata ny fandriana akory aza fa hanohy hatory eo ihany, misy manko ny hanaovany kominio, tsy hiraisana amin’i Jesoa fa mba ho hitan’ny olona sy hampandry ny konsiansy,dia izay no antony hikônfeseny. Izay tsy mahita fa ratsy ary mitondra amin’ny fahafatesana ny fahotana dia sarotra koa ny hiadiany amin’ny fahazaran-dratsy, ary izay tsy manana tanjona hotratrarina koa, na ampahafantarina ny maha ratsy ny ratsy aza, hikiribiby hisafidy izany ihany.Tonga ao an-tsaiko ny valintenin’i Samoela tamin’ny Zanak’i Israely nangataka mpanjaka (1Sam 8,4-7.10-22a), azontsika alaina ho ohatra amin’izany.
Handeha hanao kômonio ianao dia mahatsapa fa tsy mendrika, mpanota, ary marina izany, hoy Md Jean Marie Vianney. Saingy izay indrindra no hanaovanao Kômonio satria mila Azy ianao. Tsy midika anefa izany fa haninkanim-poana ny Kômonio, sanatria. Tsy hanin’ny mpidonana-poana io, hoy Kardinaly Razafindratandra izay, fa hanin’ny mpanao zavatra. Ny olona raiki-tapisaka amin’ny fanangonan-karena (Levy, לָוָהlāvāh= miraikitra) dia nandao ny famorian-ketra ka nanaraka an’i Jesoa mba ho tonga fanomezana ho an’ny hafa (Matio). Ny fiaraha-misakafo amin’i Jesoa dia midika fanekena Azy ho namana, ho mpiray petsapetsa amintsika. Midika ho fankatoavana ny antsony hanaraka Azy. Tsy afaka ny hiray latabatra Aminy manko izay tsy manam-paniriana hanaraka Azy, izay mbola mifikitra amin’ny famorian-ketrany, na sanatria an’izany mbola miray tsikombakomba amin’ny mpanora-dalàna sy ny Farisianina, ka tsy te hifangaro amin’ny poblikana sy ny mpanota. Ny fiaraha-misakafo ho an’ny Jody (ary tokony ho antsika koa) dia fanamafisana ny firaisan-kevitra sy fiombonana aina: “izay iray vatsy iray aina”.
Tsy afaka ny ho mpianatr’i Jesoa araka izany izay tsy miray latabatra Aminy, tsy miray aina Aminy ka hihevitra ny hahavita tena ka tsy hivelona amin’ny Teniny sy ny Tenany: raha tsy izaho dia tsy mahefa na inona na inona ianareo, hoy Izy.
Tsy mampivarahotsana an’i Jesoa ny haratsian-toetran’ny mpiray latabatra, eny fa na dia izay mpikiribiby amin’ny fahotana aza (ἁμαρτωλός – hamartôlos).Lazaiko matetika ny hoe: izay manana ny hazavana ao an-tranony dia tsy matahotra ny hamoha ny varavarany ho an’ny hafa any ivelany na dia maizina aza ny andro, satria tsy ny haizina velively no hiditra fa ny hazavana no tsy maintsy mivoaka manazava ny any halan-trano. Tsy ny fahotana no mifindra fa ny fahamasinana. Tsy ny tahotra ny fahotàna araka izany no tokony himasoana fa ny fikolokoloana ny fahamasinantsika, ny fibanjinana ny endrik’ilay Andriamanitra tiana hitovizana endrika.
Aleokomahita kristianina maratra nivoaka namonjy ny namana toy izay mahita ny sasany bobongolo amin’ny fikatònana an-trano, hoy i Papa François, hikombona amin’ny fitafiana ny fiatsaram-belatsihin’ny Farisianina, mihiboka amin’izay mahazatra sy mampiadana azy. Izay manana an’i Kristy sy miara-misakafo Aminy no manana ny fahazavana. Raha sanatria àry tsy izy no mampivondrona fa zavatra hafa na tombontsoa hafa, dia tsy hitondra fahazavana ho an’ny hafa na oviana na oviana isika fa hitondra fahafaham-baraka sy fanafintohinana aza, amin’ny mety fiheverantsika ny tenantsika ka hisehoantsika ho mpianatr’i Kristy (kristianina).
Enga anie Izy Kristy mandrakariva no hampiombona antsika, indrindra rehefa tafaray hankalaza ny Eokaristiaka hiezahantsika hifanampy tokoa hanamasin-tena amin’ny anarany. Enga anie mba ho amin’ny anarany mandrakariva no hivondronantsika satria izay no sakramenta hahafahantsika mahatoky fa miara-misakafo Aminy isika, ary Izy no aina ivelomantsika.
Tsy ho sanatria an’izany ny vola sy ny famorian-ketra no hibahan-toerana ao amin’ny fiainan’ny Fiangonana sy nyFikambanana lazaina fa Masina.