Sabotsy faha-27 mandavan-taona
- Ankasa Galata 3, 22-29/Salamo 104
- Tsy ankasa Joely 4, 12-21/Salamo 96
- Md Lioka 11, 27-28
Andininy roa ihany ny Evanjely anio. Na eo aza ny fialonana sy ny fiampangana nataon’ny sasany, dia ao kosa ireo nigaga ny zava-bitan’i Jesoa amin’ny nampitenenany ny moana. Anisan’izany ity vehivavy izay maniry ny hanan-janaka tahaka an’i Jesoa ka mazava loatra niantsoantso hoe Sambatra ny kibo nitondra vohoka anao sy ny nono notsentsefinao. Ny valintenin’i Jesoa dia manampy antsika hahazo ny fahasambarana sitrak’Andriamanitra ho an’ny olombelona rehetra. Tsy hoe tsy sambatra akory i Masina Maria, fa kosa ny fahasambarany dia miankina amin’ny fihainoana sy ny fitandremana ny Tenin’Andriamanitra.
I Elizabeta moa efa nilaza koa fa sambatra ilay nino izay nambaran’Andriamanitra (Lk 1, 45), i Masina Maria izay nekeny ho “renin’ny Tompony” (Lk 1,43). Tsy azo adinoina anefa ny vokatr’izany finoana izany amin’ny seha-piainana andavan’andro natrehan’i Masia Maria: nitoe-jaza raha mbola tsy miray trano amin’ny vadiny, ny fanilikilihana rehetra vokatr’izany, hatramin’ny niatrehana ny fatin’ny zanany voaheloka amin’ny sazy faratampony, natokana ho an’ny jiolahy raindahiny, dia ny famantsihana amin’ny Hazofijaliana.
Ny fiheverantsika matetika dia hoe natokan’Andriamanitra ho an’ny olom-bitsy ny fahamasinana sy ny fiainana ny finoana tahaka ny nataon’i Masina Maria. Lehibe sy tsara laza noho ny vehivavy rehetra i Maria noho ny finoany. Asain’i Jesoa hanahaka azy koa ilay vehivavy toa velom-pialonana nitsiriritra ny fahasambarany. Ny fahaizany nihaino sy nitahiry tao am-pony ny Teny no loharanom-pahasambarany, ary izay rehetra manaiky handray ny Teny afafin’ilay Teny Tonga nofo (kibo), sy mampamokatra azy eo amin’ny fiainany (nono) dia manohy ny asan’i Maria, mahatonga nofo ny Teny koa ao ami’ny fiainany ka hahafahany miha-Jesoa aloha, ary avy eo hitory izay amin’ny hafa, ka tonga fanehoana ny fitiavan’Andriamanitra, ary ny vokatra aterak’izany no voninahitra ho an’ny Ray, hoy i Jesoa. Tsy asan’olombelona anefa izany fa fahasoavana avy amin’ny Fanahy ary tohanan’ireo mofo telo, nampitomboan’ny lalivay ho tonga sakafo hahasambatra ny zanak’Andriamanitra rehetra.
Ny fahasambaran’i Masina Maria dia izay irin’Andriamanitra ho an’ny zanany rehetra. Hitombo ao amintsika anie ny finoana fa ny Tenin’Andriamanitra no hany fanilo hahafahana mizotra ny tena lalam-pahasambarana atoron’Andriamanitra antsika.