Alakamisy faha-14 mandavantaona
- Ankasa Osea 11, 1-9/Salamo 79
- Tsy ankasa Jenezy 44, 18-29; 45, 1-5/Salamo 104
- Md Matio 10, 7-15
Antsoin’i Jesoa ny Mpianany dia irahiny. Mialoha ny hanohizana ny fanazanana momba ny fanirahana dia tsara ny mampahatsiaro fa ny ho eo Aminy sy hiara-mitoetra Aminy no iantsoan’i Jesoa antsika voalohany, ary porofom-pitiavana izany (Mk 3, 13-14). Izay vao irahiny hitory ny Evanjelin’ny Fanjakan’ny Lanitra.
Eny am-pandehanana [Πορευόμενοι (Mt 10,7 BYZ), participe present du πορεύομαι (poreuomai) izay nadika hoe “Raha mandeha ianareo”], izany hoe eo am-panohizana ny lalana efa natomboka no hitoriana ny Fanjakan’ny Lanitra. Tsy mbola mahatratra ny fahalavorariana ny Apôstôly, saingy mizotra ho amin’izany ary mitory (κηρύσσω kerusso), mijoro ho vavolombelon’ny Fanjakan’ilay Ray mamondrona ny zanany, mamondrona ny ondry very, ho fianakaviana iray miaina ny fahafahana, ny hafaliana sy ny fiadanana. Andraikitry ny mpianatr’i Kristy rehetra ny mampahatsiaro ny olona fa eo anivontsika ny Fanjakan’ny lanitra.
Izany no antony hanirahana ny Apostoly ka hanaporofo ny fitiavan’Andriamanitra ny olony eo amin’ny andavanandrom-piainany amin’ny fanohizana ny asam-pamonjena efa natomboky ny Mpampianatra: ny fikolokoloana (θεραπεύω) ny marary mba hahafahany mitsangana ka hanompo (Mt 8, 15), ny fananganana (ἐγείρω) ny maty izay hoe ny miala amin’ny fahafatesana ho fiainana satria tia ny rahalahy (1 Joany 3, 14), ny fanadiovana ny boka mba hiverenany ho anisan’ny vahoaka mankalaza an’Andriamanitra (Mt 8, 1-4) ary ny fandroahana ny demony amin’ny herin’ny Fanahin’ny fahamarinana. Ireo no asa nataon’i Jesoa tantarain’ny toko faha-8-9 manontolo, hamerenana amin’ny olombelona rehetra ny hasina sy ny fahasambarana naharian’Andriamanitra azy. Izay nandray maimaim-poana no irahiny mba hanome maimaim-poana, ka hisafidy ny fahantrana, hatoky ny fitsimbinan’Andriamanitra ka haniry fiadanana ho an’izay hiantranoana.
Ny fahalalaham-po manentana ny mpianatra dia tokony ho hita taratra amin’ny fomba fiainany. Izay naka maimaim-poana tao amin’ny hafenoan’ny Trinite Masina, dia hanome maimaim-poana ihany koa. “Aza mitondra volamena na volafotsy na varahina amin’ny fehikibonareo”. Ny nadika hoe “mitondra” moa eto dia κτάομαι (ktaomai). Mahadika azy kokoa ny dikan-teny vaovao amin’ny Baiboly 2011 hoe “aza mitaty vola hatao am-paosy, na volamena izany na volafotsy na varahina”. Tsy fitadiavam-bola ny asa fitoriana na dia mendrika ny karamany aza ny mpiasa ka “izay mitory ny Vaovao Mahafaly dia hahazo fivelomana amin’izany asa izany” (1 Kor 9, 14). Tsy avelan’i Jesoa hitondra kitapom-batsy akory fa hiantehitra amin’ny fitsimbinan’Andriamanitra ka hatoky ny fitiavan’ny rahalahy mendrika (ἄξιος axios) hampiantrano. Izay mampiantrano ny madinika sy ny tsy manan-kialofana kosa, na tsy nahalala aza, dia antsoin’i Kristy ho any amin’ny valisoan’ny olo-marina (Mt 25, 31-46) satria nohasoavin’ny Ray.
Ny tsy fitondrana akanjo roa moa, raha manambara ny maha-izy azy sy ny fomba fiainana ny akanjo, dia manambara ny hadiovam-po, izany hoe ny fahatsoram-piainana tsy hiatsara velatsihy, tsy hanana “double personnalité”, fa hitafy akanjo iray ihany (Galata 3, 27). Ny kiraro kosa, ao amin’i Md Marka (Mk 6, 9) dia anaovana, entina hilazana ny safidy malalaka, fa ao amin’i Matio, ny hoe tsy manao na dia kapa aza, dia hoentina hilazana ny toe-tsaina maha-mpanompo (jereo Alakamisy faha-4).
Ny fiadanana kosa, rariana mba ho an’ny trano idirana sy izay monina ao, dia mitaky ny fahamendrehan’izay tolorana azy, saingy tsy ho raraka an-tany na eo aza ny tsy hafamendrehan’izay tolorana. Mazava loatra fa izay manokatra ny fony ho amin’ny fitiavana no zanaky ny fiadanana, ary ireo no hampiantrano ny mpamafy fiadanana. Ny fikatsahana ny fiadanana ho an’ny hafa dia loharanom-piadanana mandrakariva ho an’izay manao izany. Ny mety ho tsy fandraisana anefa, ny tsy fahamendrehan’izay tolorana dia tokony hanosika ny mpianatra “hanintsana ny vovoka” amin’ny tongotra, tahaka ny Jody hiditra ao an-tanàna masina, rehefa avy any amin’ny tanin’ny tsy mpino, entina hilazana fa izay tsy mandray ny rahalahy tsy manana afa-tsy ny fitiavan’Andriamanitra ho kiadiny, dia tahaka an’i Sôdôma sy Gômôra, tsy nandray ny irak’YHWH ka natelin’ny afo (Jenezy 19, 24ss).
Tsy afaka hanery ny hafa handray azy ny mpianatra ka izay mety ho fandavana tsy sanatria hampivadika ny zanak’ondry ho tonga biby masiaka (Evanjely rahampitso) fa kosa ho fidirana ao amin’ny tanànan’ny fiadanana, ka hanajanonana any ivelany (toy ny vovoka amin’ny tongotra) izay rehetra tsy mifanaraka amin’ny fahamasinana atoron’ny Evanjely ho lalana mitondra mankamin’ny fahasambarana.