5 janoary
- 1 Joany 3,11-21
- Salamo 99
- Md Joany 1,43-51
Miala amin’ny fahafatesana ho amin’ny fiainana izay tia namana. Izay tsy tia kosa mitoetra ao amin’ny fahafatesana (Vak I). Ary tia ny namana izay mahafoy ny aina ho an’ny namana. Miantomboka amin’ny fahaizana mifampizara ny fananana aloha izany, hoy i Md Joany, ary izany no hahafahantsika mahazo toky eo anatrehan’Andriamanitra.
Raha mahatsapa isika fa azy Tompo satria noharìny, ary vahoaka sy ondry fiandriny, dia ho moramora amintsika ny tsy hifikitra amin’izay tsy nisasarantsika fa fahasoavany. Inona moa, hoy ny Apôstôly, no eo am-pelantanantsika, ka tsy noraisintsika avy amin’Andriamanitra? (1 Kôr 4,7).
Ny Evanjely indray dia manohy ny fiantsoana ireo Apôstôly. Nanaraka an’i Jesoa i Andre sy Piera avy ao Betsaida, dia avy ao koa i Filipo ary voaantso ihany koa. I Filipo indray nihaona tamin’i Natanaely – “fanomezan’Andriamanitra”, Israely vahoakany sy ondry fiandriny – ka nitantara taminy izay hitany mahakasika ny fahatanterahan’ny Soratra Masina. Haintsika ve ny voalazan’ny Mpaminany sy ny Lalàna? Milaza mazava ny Evanjelista araka izany fa mila mandalina ny Soratra Masina isika raha te hahazo bebe kokoa ny momba an’i Jesoa.
Ao amin’ny Lalànan’i Moizy dia voalaza fa nanonofy i Jakôba ka nahita tohatra nampitohy ny lanitra sy ny tany, ary ny Anjelin’Andriamanitra miakatra sy nidina teo amboniny teny an-tampon’ny tohatra. Andriamanitra ao amin’ny voninahiny mampanantena fa tsy handao azy mandra-pahatanterahan’izany fampanantenana izany (Jen 28,10-17). Ny fiheveran’ny Ejipsiana sy ny tany manodidina dia andriamanitra mitoka-monina any an-danitra ambony any ny andriamanitra ka mila ny sariny na ny biby na zava-maniry hisehoany hahafahany mampiseho ny tanjany sy manampatra ny heriny, ary mila manao sorona sy fanetren-tena goavana ny olona vao mahazo fahasoavana na mba mahazo ny indrafony kely. Ho an’i Israely kosa indray dia Andriamanitra miara-monina amin’ny vahoakany ny Andriamanitr’izy ireo (Dt 4,7), ary lazain’i Jakôba fa tohatra miorina amin’ny tany ary tafapaka any an-danitra no hivezivezen’ny anjeliny mitatitra ny fahasoavana ho antsika.
Ambaran’i Jesoa an’i Natanaely fa zava-dehibe kokoa noho ny fahafantarany antsika tsirairay (ny hoe mahafantatra moa dia mitovy hevitra amin’ny mitia amin’ny hebrio) ny fahitantsika ny anjelin’Andriamanitra miakatra sy midina eo ambonin’ny Zanak’olona. Ambarany amin’izany fa izy no ilay tohatra mampihavana ny lanitra sy ny tany, ka avy aminy no hahafahantsika rehetra manovo ny fahasoavana feno, ary ny Anjelin’Andriamanitra kosa mandrotsaka ny fahasoavan’Andriamanitra amintsika ary manandratra antsika ho tonga zanaka mpandova ny lanitra miaraka amin’i Kristy.
Andriamanitra miara-monina amintsika no ankalazaintsika amin’izao Noely izao ka hitalahoantsika Izy mba hanome antsika finoana tsy mety lefy dia ho tody antsika any amin’ny valisoa nampanantenainy hanehoany ny voninahiny isika.